Every CEO Must Be CLO

ალბათ სათაურის წაკითხვის შემდეგ გაგიჩნდათ შეკითხვა რას ნიშნავს CLO? მათთვის ვინც ჯერ არ იცის  განვმარტავ, რომ CEO იშიფრება როგორც Chief Executive Officer (ანუ მთავარი აღმასრულებელი ოფიცერი) ქართულად კი გენერალური დირექტორი. მეორე აბრევიატურაში კი ასო-ბგერა L იშიფრება როგორც Listening ანუ მოსმენა. ამ პატარა წინადადების ქვეშ იგულისხმება ადამიანის და რა თქმა უნდა მენეჯერის, ერთ-ერთი უმნიშვნელოვანესი თვისებაა - მოსმენის კულტურა.

პირადი პრაქტიკიდან მინდა გითხრათ, რომ ადამიანების და მათ შორის მენეჯერების უმეტესობას ეს თვისება არ გააჩნიათ. ამ თვისების სწორი გამოყენების შემთხვევაში კი ადამიანი, რომელიც უსმენს იღებს უმნიშვნელოვანეს რესურსს - ინფორმაციას, რომელიც შემდგომში საკუთარი ინტერესების შესაბამისად უნდა გამოიყენოს. ინფორმაცია, ეს არის იარაღი ადამიანებთან ურთიერთობის თვალსაზრისით, რომელსაც სწორი მოპოვება და შემდგომ შესაბამისი გამოყენება ესაჭიროება. მეორე მხარესთან საუბარის, ან თუნდაც მოლაპარაკების დროს, მნიშვნელოვანია დასვათ სწორი შეკითხვები და გულმოდგინედ მოუსმინოთ პასუხებს. მეორე მხარესთან საუბრის დროს, უნდა გამოიყენოთ შემდეგი პროპორცია, საუბარი - 30%, მოსმენა-70%.

იმ შემთხვევაში თუ თქვენ ხართ მენეჯერი, ისწავლეთ თქვენი თანამშრომლების მოსმენა, ეს ზრდის მათ მოტივაციას. მოსმენისას დაუსვით მათ დამატებითი შეკითხვები, რომ მიიღოთ ამომწურავი ინფორმაცია. აგრეთვე გადაამოწმეთ თქვენი თანამშრომლების რეკომენდაციების ლოგიკურობა. ეს თვისება დაგეხმარებათ ბიზნეს რისკების აღმოჩენასა და გაანალიზებაში. თუ თქვენ ხართ სეილსმენი მაშინ აუცილებელია, რომ კლიენტმა მოგაწოდოთ სხვადასხვა სახის ინფორმაცია. გაყიდვებში არსებობს ასეთი წესი - რაც მეტ ინფორმაციას მიიღებ შენი კლიენტისგან, მით უკეთესად გაიგებ რა სურს მას, შესაბამისად მით უფრო უკეთესად შეძლებ მისი მოთხოვნილების დაკმაყოფილებას. იმისათვის, რომ დააზუსტოთ ინფორმაცია, რომელსაც გეუბნებათ კლიენტი შეგიძლიათ გამოიყენოთ სხვადასხვა მეთოდები. მაგალითად, იმ სიტყვების გამეორება კითხვის ფორმატში, რომელიც გამოიყენა მოსაუბრემ ან სთხოვთ მეორე მხარეს თავისი ნათქვამის უფრო დეტალური განმარტება.

ცნობისათვის, არსებობს ორი ტიპის შეკითხვები: ღია და დახურული. დახურული არის ისეთი შეკითხვები, რომელზეც პასუხი არის ან კი, ან არა, ხოლო ღიაა ისეთი შეკითხვები, რომლებზეც პასუხი უნდა გაეცეს უფრო დეტალურად. იმისათვის, რომ მივიღოთ მოსაუბრისგან დამატებითი ინფორმაცია უნდა გამოვიყენოთ ორივე ტიპის შეკითხვები.

შეცვალეთ თქვენი მიდგომა დღევანდელი დღიდან. გამოიყენეთ მეორე მხარესთან საქმიანი ურთიერთობის დროს ეს მეთოდი. ეს ხომ მცირე დეტალია, თუმცა სულ მალე დაინახავთ, რომ ის თქვენი ახალი გამარჯვებების ერთ-ერთი მნიშვნელოვანი საწინდარი გახდება.  ეს არის წესი, რომელსაც პრაქტიკაში იყენებენ წარმატებული მენეჯერები და საუკეთესო სეილსმენები.