ხშირად დაშვებული შეცდომა კონკურენტული უპირატესობის მოპოვებისას

მოგეხსენებათ, რომ ჩვენს გუნდს ხშირად აქვს შეხება სხვადასხვა კომპანიასთან, რომელიც მოღვაწეობს ბაზარზე და ქართულ ეკონომიკას ქმნის. იმ გამოცდილებიდან გამომდინარე, რომელიც მათთან მუშაობისას დაგვიგროვდა, შეგვიძლია ვთქვათ, რომ ქართულ კომპანიებს განვითარების მეტი შესაძლებლობები აქვთ. კომპანიების უმეტესობა განვითარების საწყის ეტაპზეა და ყველაფერი ჯერ კიდევ წინ აქვთ.

სწორედ აქ იმალება მთავარი იდეა, რაც მათ მიერ გაწეული კონკურენციის თვალსაზრისით ძალიან მნიშვნელოვანია. ხშირად ვხვდებით სიტუაციას, როდესაც კომპანიის ხელმძღვანელები უშვებენ ამ ტიპის შეცდომებს და დღეს მსურს სწორედ ამაზე გესაუბროთ, რათა არასდროს გაიმეოროთ მსგავსი რამ.

საკითხი ეხება იმ ფაქტს, რომ ხშირად კომპანიები მონაწილეობას იღებენ ასე ვთქვათ, ფასების ომში. ეს არის ერთ-ერთი ყველაზე არასწორი გადაწყვეტილება, რაც შეიძლება კომპანიის ხელმძღვანელობამ მიიღოს.

რატომ ხდება ასე? - რთული მისახვედრი არაა, რომ ეს გაყიდვების სიმცირიდან გამომდინარეობს.

თუმცა უფრო საინტერესოა, როგორ იქცევიან ამ დროს გაყიდვების წარმომადგენლები. სამწუხაროდ, ისინი წუწუნებენ კონკურენტის უკეთეს ფასებზე, შემდეგ კი გამოუცდელი ხელმძღვანელი უჯერებს მათ და ამცირებს ფასს. მაგალითად, თუ მათი პროდუქციის ღირებულება იყო 100 ლარი, კონკურენტის კი 95, მოცემული კომპანიაც 95 ლარს აწესებს თავის პროდუქციაზე. თქვენი აზრით, როგორ იქცევა ამ დროს კონკურენტი? დიახ, ის უფრო ამცირებს ფასს და ვიღებთ იმავე ფასთა სხვაობას.

რა იცვლება ამ შემთხვევაში? სამწუხაროდ არაფერი კომპანიისთვის. იცვლება მხოლოდ ის, რომ მოგებული რჩება მომხმარებელი, მოცემული ქმედება კი არც ერთი კომპანიისთვის არ არის წინ გადადგმული ნაბიჯი.

სამწუხაროდ, საქართველოში არის ისეთი სფეროები, რომლებიც ამ თვალსაზრისით დიდი პრობლემების წინაშე აღმოჩნდნენ. მაგალითად იყო ბევრი კომპიუტერული და მობილური ტექნიკის მაღაზია, რომლებმაც ვერ გათვალეს წინასწარ მსგავსი ქმედებების შედეგები,  საფასო კონკურენციამ უარყოფითი გავლენა მოახდინა მათზე და ბაზრის დატოვება მოუწიათ.

არაერთი მაგალითიდან ვრწმუნდებით, რომ კონკურენციის მსგავსი ფორმები არასწორია და ამ ყველაფერს არ მივყავართ უკეთეს შედეგთან.

იმისათვის, რომ მოიპოვოთ კონკურენტული უპირატესობა, მთავარი გასაღები ბაზრისთვის განსხვავებულის შეთავაზებაში უნდა ეძებოთ, რათა გამოირჩეოდეთ სხვა კომპანიებისგან. პირველ რიგში კი უნდა იყოთ ფოკუსირებული მომხმარებლებზე, რათა მათ მიიღონ მაქსიმალური სარგებელი და გახდნენ მეტად ლოიალურები. ეს არის ის, რაც დაგეხმარებათ მიაღწიოთ წარმატებას ნაცვლად იმისა, რომ შეხვიდეთ საფასო კონკურენციაში და წააგოთ როგორც თქვენ, ასევე თქვენმა კონკურენტმა.